هذا اللي بيطفر بي قلت لك لا تقول ملعقه ..

وانا مب نشبه ..

وعلى طاري كلامي ، اصلا انا ما اقول الا الصدق وانا قلت اللي اشوفه واعرفه :)

اول شي الصور ما ظهرن لي بس انا متاكده انا صور قمة في الابداع ..

وتعليقي بيكون رد على كلام الاخ [ معين يحيى الصايدي ] :

تقول اماراتي يصيح ع حال ولده ليش انه يرمس عربي مكسر ..

ما اظن انه رمسته مكسره من شي ..

يوم انه يقبض ولده حق البشكارة ومدخلنه مدارس اجنبيه ويرمسونه انجليزي في البيت اونه يقوون لغته من وين الولد بيتعلم يرمس عربي ؟؟
يعني بذمتك العربية بييبها من البشكارة والا من الدريول (السايق) والا من الزراع والا من ابلته الاجنبيه .؟؟

لا تيلسون تعقون اللوم عالاجانب مشاكل اعيالكم مع العربية انتوا سببها مب الدولة والا الاجانب..

وعطاري الاماكن الترفيهية والحدايق والمنتزهات اللي ممزورة هنود ترى مب من شي
نحن اللي مسلمينهم الخيط والمخيط ما نظهر برع نقول شمس ظللوا حقنا الحدايق قلنا حر .. يعني نحن مب ويه شي الهنود يستفيدون من كل شي .. كل ويك اند تشوف الهندي قابض حرمته واعياله ومودنهم يستانسون في مكان الدولة خصصته حقنا نحن..

خلاصة الكلام : لا نيلس نعلق اخطاءنا ع شماعه غيرنا ..
كلمة اخيرة للاخ، اللي عرفته انك يمني .. انته ما تعرف حال المواطنين داخل البلاد لا ترمس عن شي ما شفته بعيونك صحيح انه عندنا اجانب كثر شعر راسنا وعددنا بس 800000 الف حتى المليون ما وصلنا .. فاكيد بنشوف اشخاص من جنسيات متعدده وعمال واجانب لكن انه المواطن يحس بغربة وفي بلاده !!! هذه قويه شوي ..

اذا الغريب يحس جنه في بلاده احينه المواطن يحس جنه غريب
لا ما اظن ..
اصلا مستحيل ..
المواطنين خقاقين وبطرانين

يوم ما يبا يشتغل قال الاجانب ماخذين الوظايف كلها ..

اذا تاخر في روحته للدوام قال الاجانب ماخرينا مسببين لنا زحمه { هم صح مسببين زحمه بس لو ظهرت من وقت بتوصل من وقت }

كل شي يستوي في البلاد قلنا الاجانب الاجانب ..

وانا اقول المواطنين المواطنين .. نحن لو نعرف نستغل كل شي لصالحنا جان ما وصلنا لهالحال ..

طولت وااايد وجلبت الموضوع من صور جميلةلمساحه حق ردودي اللي قد يعتبرها البعض مملة.. بس انا ما يهمني حد المهم اني قلت راي وظهرت اللي في خاطري ..

عبدالله السالم السموحه منك جلبت مدونتك لساحه حق ردودي وتعليقاتي اللي ممكن انها تضايج بك <<<<<<<<<<<<<<<< احينه بتقول ما جذبت يوم قلت نشبة خخخخ

والسموحه بعد من الاخ معين بس بغيت اقول راي ..

لا لا ، قصدت هو موضوع عن الصور فلا تسحبه للسياسة مثلا ، أو الاقتصاد ، أو الدين ، هذا تشتيت .
هناك العديد من المواضيع في مدونة وسوم ستثير رغبتك في الكتابة حول العمالة في قطر أو دول الخليج عموما ، أو عند الوجود الأمريكي إن أردت ، أو عن أشياء أخرى ، فقط أنا أتحدث عن تصنيف المقالات بتنظيم جميل .
الصور للصور والشعر للشعر والسياسة للسياسة وهكذا .
أهلا بك من جديد يا معين ، وبالتأكيد مدونة وسوم مفتوحة لكل الآراء .

شكرا لك مجددا استاد عبدالله