بخير
بخير جعلك طيب وجعلك بخير
مرتاح وعلومي تسرك ، مليحة
يمكن كذا محتاج لشوي تغيير
أو كنبَات البيت ما هي مريحة
وشوي يرهقني السهر والتفاكير
واستفتح الدنيا بروحٍ جريحة
وشوي متورط بكثر المخاسير
في عز ما الدنيا يديها شحيحة
أحيان لو ينصون بيتي مسايير
ما عندي اللي يشتري لي ذبيحة
والعسر يا ابن العم أبشرك تكفير
حتى نموت أرواحنا مستريحة
لولا العسر ضاعت علينا المعايير
بين القلوب الطيبة والقبيحة
كم صاحبٍ تشريه حمر الدنانير
ما تشبع أذنك من روايع مديحه
لكن ليا صكت عليك المقادير
يطلع من المتردية والنطيحة
***
وبخير جعلك طيب وجعلك بخير
مرتاح وعلومي تسرك ، مليحة
يمكن شوي أقشر وحظي معيثير
أركض عمر واقدام وقتي كسيحة
والسفر موجعني وكثر المشاوير
ومخالَط العالم شريحة شريحة
تعبت راح العمر كله وأنا أسير
وأخاف عاده فـ اخر السير طيحة
تضحك بها بعض الوجيه المكاشير
اللي يسمّون التشفي نصيحة
وابشرك طيب ومرتاح وبخير
أما فضيحة ، موت ما به فضيحة .
_________
29/3/2007
15:41
طبربور
صح لساااااااااانك … رائع … جدا ..
———–
يمكن كذا محتاج لشوي تغيير
أو كنبَات البيت ما هي مريحة
———–
ياخي تعال وقشّر الهم تقشير ..
وإن صاح حزنك , فش خلقك بصيحه
تدري ؟ كبير اليأس يحتاج تكبير
أما يريحك صدق .. ولا تريحه :)
أول مرة أكون صاحب أول رد هنا ….
تهانيّ لي .. :)
عبدالله .. وشتقول أعلاه ؟؟
أنت بخير ؟؟
طمنّي .. بطريقة أخرى … بليز …
…………..
فهد لو أن الهم جملة وتعبير
كتبت فيه من الشعر ما يزيحه
لكنه الماخوذ فوق اي تصوير
واحنا نهوّن وجعته بالقريحة
سلامتك ياخوك ويش هالتعابير
ضيقت علي الدار لوهي فسيحه
أوزن دلالك ياولد بالمباهير
ويزين لك فنجالها قبل فيحه
صح لسانك اخوي عبدالله رديتنا لايام بيت الشعر ^_^
هذي رسالة غلا للصاحب الغالي…عساك تذكر غلانا يوم تفتحها..كتبتها يوم ايميلك لفاني
.. كان ماجيت في بالك امسحها
اقول
سلام يااهل الجود والطيب والعز*ياللي لكم بالصدر قدر ومعزه القلب من فرقا الاجاويد يهتز مثل الشجر يوم العواصف تهزه في قربكم كل المخاليق تعتز واحساسي لكم يشتاق في كل حزه
ودي اكتب والقلم عيا يطيع مدري الاشواق ولا انت السبب كيف اعبر والحكي مني يضيع اسعفيني ياقواميس العرب وش ابكتب فيك (( يالحر الرفيع )) وانت وصفك من اعاجيب العجب هذي اقلامي بكسرها جميع في سكوتي تصبح حروفي ذهب …..
اخوك
أمير العتيبي …..
تفرحنا بأهازييجك
وتحزننابمشاعرك
0
0
0
0
0
قف
0
0
0
0
0
أنظر خلفك
0
0
0
0
0
0
لصبحك المشرق بكل التباشير
خلاص قوم اليوم من دون طيحه
الربان ، أمير العتيبي :
شكرا لمروركما
و ..
إيش هذا … أبدعت يا اخ عبدالله
التعبير جداً طريف :D
ايمي حبٌ أول ، مع الاعتذار لمحمد الحضيف :
إيش هذا ؟ من هذه العبارة أشعر أنك في وادي .. والشعر الشعبي في وادي ، إعترفي : )
مريت
وليس كغيري
متألمه
لليله
المهم والاهم انك بخير وطيب ومرتاح
اقل شي اقوله رووووعه
ومشكور على كل حرف تمتعنا فيه
أحيان لو ينصون بيتي مسايير
ما عندي اللي يشتري لي ذبيحة
ماأجمل هذا الشعور وأن تكافح لتكرم ضيفك أنها من شيم العرب لقد أحببتك هنا كما أنت بكرم العرب …
تعبت راح العمر كله وأنا أسير
وأخاف عاده فـ اخر السير طيحة
وجدت نفسي في البيت اعلاه :(