ابوس روحك واقبّل جبهتك يافلان

تاقف معي وقفة المغبون للمغبون

تكفى طلبتك ، نوقف لعبة الشيطان

ما دامها في الخيال المستباح ودون

تكفى وحق التعب والحب بين اخوان

تراني من اول البارح وانا مطعون

بكيت لما بدت تبكي معي الجدران

وقرفت حالي ولا اوسعني فسيح الكون

ماكنت انا اللي معاك البارحة سهران

يمكن بقايا مرض في الذاكرة مدفون

ما كنت اشوفه سوى الثاير على الاوزان

والرافض المزدري للعيب والقانون

كسّر قيوده وراح وباغت السجان

واطلق سراح الجنون ف عالم مجنون

ولما انطفت هالشرارة وانجلى الدخان

لقيته اللي خنق نفسه وهو مسجون

تعبان ياخوك وانا ان قلت لك تعبان

تأكد أني وصلت لمستوى ملعون

خايف من الطيش هذا يكسر البيبان

ويسيل باثامنا في الشارع المسكون

بكرة اذا ما تلاحقناه بالنسيان

تكرع ذيابة عطشنا في الدم المأفون

وليا عوا الذيب فينا تصمت الحملان

عقبه تخيل – معاذ الله- ويش نكون !

أليَن من أفكارنا واقسى من الصوّان

والجو مابيننا رغم الوفا مشحون

***

تعال صافح .. من الانسان للإنسان

في ايدينك الما وانا في ايديني الصابون