تعال بالله سكن هالجنون الجموح

لولا الرجا فيك كان اجتاحني من زمان

يجنح بي كثير واللهفة تزيده جنوح

ياصل حدود التمرد في القلم واللسان

يخط باسمي متونٍ ما عليها شروح

طلاسمٍ مالها معنى ولا ترجمان

يحرجني القاري المشدوه يبغي وضوح

واصرفه : علمها في داخلي يا فلان

في داخلي قريةٍ ماتت منازل ودوح

تبكي بها الريح نوع ٍ من دموع الحزان

تطايحت من سما الحسرة عرايش ولوح

الله عقب الشموخ اشلون طعم الهوان

أطلال ، يضفي عليها الليل صمت ونزوح

يقرا على سورها البالي نصوص البيان

ياما على سورها البالي تهاوت طموح

بنيت على الحلم واثر الحلم مافيه امان

باكر يطل القمر يبغي حديث السطوح

ويش اعتذر له الى شعشع جبينه وبان

اقول له خلك هنيا دقايق واروح

والا فاعزيه والدنيا ابتلا وامتحان ؟

يا حالة العاجز اللي فيه دم ٍ لحوح

ينفيه عجزه وهو ثابت وجود وكيان

ياللي تخيرت لي وجه الغياب الكلوح

ما تدري ان الغياب اصله : جريمة جبان

انا على ما انت خابر دمعتين ٍ وروح

يلعب بها الفقد لعب الريح بالخيزران

يسقيني الليل من كذبه غبوق وصبوح

وليا آنطرّ الفجر بكرة ولاني ظمان

تعال وافداك قلبٍ صار كله جروح

لوّك تبي تجرحه ما عاد تلقى مكان

تعال .. والله لاشفت اسمك بعيني يلوح

لاخلع عليه انتمائى ويش تبغى كمان ؟