ياللي قتلت الحـكايا في شفاياي

بحجة اني بدون اذنك هويتك

هو ذنبي اني عزفت الوجد والناي

وغنيت ( جاك الغلا .. والبيت بيتك ) ؟

وسمّعتك أحلى حديث العشب للماي

ورشفتك أبعد خيال ولا رويتك

تبيني آقول ويش أكبر خطاياي ؟

اني تعشّمت فيك اللي عطيتك

غرست ورد المحبة وانت وياي

ويوم أورقت لك غصونه ما لقيتك

ان كنت ناوي تودعني وتنساي

وشلون ابا اطرد خيالك لا طريتك

وشلون اصدّق رحيلك وانت جواي

كاني قدرت اسمعك ولا قريتك

في مهجتي في عروقي في خلاياي  

في شربة الما – بعد – ذقتك وريتك

في نبرتي في قصيدي في حكاياي  

في كل حرف ابجدي لو ما عنيتك

ارحل وخلّ المواجع تسكن حشاي

ولا تعاتب عيوني لا بكيتك

يكفيني اسمك حفرته في حناياي

تنسى الورود النسايم ما نسيتك