يا اللي رفضت الصلاة إلا على يمتك

اقريك عن ناس نجدٍ والحجاز السلام

تعجبوا فيك ، من عزمك ومن همتك

وتأملوا فيك خيـــــــر وقلدوك الوسام

تاطا المنايا على دربك ولا همتك

وتجلس على العرش تضحك والحوادث قيام

سيما المجاهد على وجهك وفي عِمتك

وليا تحدثت ما تخطي صميم العظام

ضحيت بالموطن اللي تربته ضمتك

مثل أشقر الريش لا ذاق المذلة وْشام

واخترت درب الفلاح محدد مهمتك

لو عارضوك العدا بسيوفهم والسهام

كم صوبوا لك مخالبهم وكم خمتك

واقسمت ما تقعد إلا فوق راس السنام

شكوك برماحهم غدرٍ ولا دمتك

ويوم عجزوا طلّعوا لك من " فتاوى الإمام "

واصل جهادك ولا يثنيك عن قمتك

ما قال كوفي عنان وما تقوله حذام

وشعاد لو كل دور إعلامنا ذمتك

هي دايمن من عرفناها تذم الكرام

في عصرنا لا اعتراض .. إلا وفي ذمتك

من قال : تبت يدا أبي لهب شق الكمام !

صح الله لسانها اللي بالاسم سمتك

أنت الأسد في زمانٍ ساد فيه النعام